நீங்கள் தேடியது "முழு அடைப்பு"

புதுச்சேரி:

விலைவாசி உயர்வை கட்டுப்படுத்த வேண்டும், குறைந்தபட்ச மாத ஊதியமாக ரூ.21 ஆயிரம் வழங்க வேண்டும், தொழிலாளர்களுக்கு பாதகமாக சட்டங்களை திருத்தக்கூடாது.

பொதுத்துறை நிறுவனங்களை தனியார் மயமாக்கக்கூடாது என்பது உள்ளிட்ட கோரிக்கைகளை வலியுறுத்தி நாடு முழுவதும் இன்றும்( செவ்வாய்க்கிழமை), நாளையும் அனைத்து தொழிற்சங்கங்கள் சார்பில் பொது வேலைநிறுத்த போராட்டத்திற்கு அழைப்பு விடுக்கப்பட்டுள்ளது.

புதுவையில் ஐ.என்.டி.யூ.சி., ஏ.ஐ.டி.யூ.சி., சி.ஐ.டி.யூ., தொ.மு.ச., ஏ.ஐ.சி.சி.டி.யூ., எல்.எல்.எப். உள்ளிட்ட தொழிற்சங்கங்கள் சார்பில் இன்று ஒரு நாள் முழு அடைப்பு போராட்டத்திற்கு அழைப்பு விடுக்கப்பட்டது. இந்த போராட்டத்திற்கு பிற தொழிற்சங்கங்கள், அரசு ஊழியர் சங்கங்களின் கூட்டமைப்பு, வணிகர்கள் சங்கம் உள்ளிட்டவை ஆதரவு தெரிவித்தது.

இந்த நிலையில் இன்று காலை முழு அடைப்பு போராட்டம் தொடங்கியது. போராட்டத்தால் புதுவையில் பஸ்கள் ஓடவில்லை. தனியார் பஸ்கள் மட்டுமின்றி புதுவை அரசு போக்குவரத்துக்கழக பஸ்களும் ஓடவில்லை. தமிழகத்தில் இருந்து புதுவைக்கும், புதுவை வழியாக செல்லும் தமிழக அரசு பஸ்களும் குறைந்தளவில் போலீஸ் பாதுகாப்புடன் இயக்கப்பட்டது.

இதனால் பயணிகள் கடும் அவதிக்குள்ளாகினர். பஸ் நிலையம் வெறிச்சோடி காணப்பட்டது. வெளியூரில் பணி செய்யும் ஊழியர்கள் பஸ் நிலைய வாசலில் நூற்றுக்கணக்கில் பஸ்களுக்காக காத்திருந்தனர். தனியார் என்ஜினீயரிங், மருத்துவக்கல்லூரி மாணவர்களை அழைத்து செல்வதற்காக சில பஸ்கள் மட்டும் இயங்கின. போராட்டத்துக்கு ஆதரவு தெரிவித்திருந்ததால் ஆட்டோ, டெம்போக்களும் முழுமையாக இயங்கவில்லை.

நகரின் பெரிய வணிக நிறுவனங்கள் முதல் சிறிய கடைகள் வரை அனைத்தும் அடைக்கப்பட்டு இருந்தது. இதனால் காலை நேரத்திலேயே சாலைகள் வெறிச்சோடி காணப்பட்டது. பெரிய மார்க்கெட், சின்ன மார்க்கெட், நெல்லித்தோப்பு, முத்தியால்பேட்டை மார்க்கெட் வளாகத்தில் பெரும்பாலான கடைகள் அடைக்கப்பட்டிருந்தது.

நகர பகுதி மட்டுமின்றி கிராமப்பகுதிகளிலும் கடைகள் அடைக்கப்பட்டிருந்தது. சேதாரப்பட்டு, மேட்டுப்பாளையம், தட்டாஞ்சாவடி, திருபுவனை உள்ளிட்ட தொழிற்பேட்டைகளில் தொழிற்சாலைகள் இயங்க வில்லை. புதுவையில் பெரும்பாலான தனியார் பள்ளிகளுக்கு விடுமுறை அளிக்கப்பட்டிருந்தது.

அரசு பள்ளிகள் இயங்கினாலும் மாணவர்களின் வருகை குறைவாக இருந்தது. மத்திய-மாநில அரசுகளின் அலுவலகங்கள் இயங்கினாலும் ஊழியர்களின் வருகை குறைவாக இருந்தது. ஒட்டுமொத்தமாக பந்த் போராட்டத்தால் புதுவையில் இயல்பு வாழ்க்கை வெகுவாக பாதிக்கப்பட்டது.

போராட்டத்தையொட்டி புதுவையில் பலத்த பாதுகாப்பு ஏற்பாடுகளை போலீசார் செய்திருந்தனர். பஸ் நிலையம், ரெயில்வே நிலையம் உள்ளிட்ட மக்கள் கூடும் இடங்களில் துப்பாக்கி ஏந்திய போலீசார் பாதுகாப்பு பணியில் ஈடுபட்டு ரோந்து சென்றனர். #BharatBandh

திருவனந்தபுரம்:

சபரிமலை பகுதியில் தொடர்ந்து ஊரடங்கு உத்தரவை நீட்டித்து வருவதற்கு எதிர்ப்பு தெரிவித்து கேரள மாநில சட்டசபையில் பா.ஜ.க. உள்ளிட்ட கட்சி உறுப்பினர்கள் தொடர்ந்து அமளியில் ஈடுபட்டு வருகின்றனர்.


போலீசாரின் இந்த அடக்குமுறையை கண்டித்து திருவனந்தபுரம் மாவட்டத்தில் நாளை முழு அடைப்புக்கு பா.ஜ.க. அழைப்பு விடுத்துள்ளது. #BJPshutdown #Trivandrumshutdown #BJPworkers

புதுச்சேரி:

சபரிமலை ஐயப்பன் கோவிலுக்கு அனைத்து வயது பெண்களும் செல்லலாம் என உச்சநீதிமன்றம் தீர்ப்பளித்துள்ளது.

உச்சநீதிமன்ற தீர்ப்பை கேரளா மாநில மார்க்சிஸ்டு கம்யூனிஸ்டு அரசு அமல்படுத்த பல்வேறு நடவடிக்கைகளை எடுத்து வருகிறது.


இந்த நிலையில் மண்டல பூஜைக்காக ஐயப்பன் கோவில் திறக்கப்பட்டுள்ளது. பக்தர்கள் வந்து செல்ல கேரளா போலீசார் பல்வேறு கட்டுப்பாடுகளையும் விதித்துள்ளனர். இதனால் ஐயப்ப பக்தர்கள் கோவிலுக்கு செல்வது வழக்கத்தை விட குறைந்துள்ளது.

சபரிமலையின் புனிதத்தை பாதுகாக்க வேண்டும் என வலியுறுத்தியும், பக்தர்களுக்கு கட்டுப்பாடுகள் விதிப்பதை கண்டித்தும் 26-ந்தேதி புதுவையில் முழு அடைப்பு போராட்டம் (பந்த்) நடத்தப்படும் என பா.ஜனதா அழைப்பு விடுத்துள்ளது.

இந்த போராட்டத்திற்கு இந்து முன்னணி, விசுவ இந்து பரி‌ஷத், ஐயப்ப சேவா சங்கம் ஆகியவை ஆதரவு தெரிவித்துள்ளது. அதே நேரத்தில் விடுதலை சிறுத்தைகள் மற்றும் கம்யூனிஸ்டு கட்சிகள் பா.ஜனதா அழைப்பு விடுத்துள்ள பந்த் போராட்டம் உள்நோக்கம் கொண்டது, தேவையற்றது என்றும், புயலால் மக்கள் பாதிக்கப்பட்டுள்ள நிலையில் பந்த் மேலும் பாதிப்பை ஏற்படுத்தும். பந்த் அறிவிப்பை திரும்ப பெற வேண்டும் என வலியுறுத்தி இருந்தனர்.

முதல்-அமைச்சர் நாராயணசாமியும் புதுவையில் பந்த் போராட்டம் நடத்த எந்த அவசியமும் இல்லை. கேரளா மாநிலத்தில்தான் இந்த போராட்டத்தை நடத்த வேண்டும்.

இந்த பந்த் போராட்டத்தை மக்கள் புறக்கணிக்க வேண்டும் என்றும் கோரி இருந்தார். மேலும் சட்ட ஒழுங்கில் பாதிப்பு ஏற்பட்டால் கடும் நடவடிக்கை எடுக்கப்படும் என்றும் எச்சரிக்கை விடுத்துள்ளார்.

இதனிடையே பா.ஜனதா கட்சியினர் மாநில தலைவர் சாமிநாதன் தலைமையில் நேற்று மாலை பெரியார் சிலை அருகில் இருந்து பந்த் போராட்டத்திற்கு ஆதரவு கோரி ஊர்வலம் சென்றனர்.

அனைத்து வணிக நிறுவனங்கள், கடைகள் ஆகியவற்றுக்கு நோட்டீஸ் கொடுத்தபடி நகர பகுதி முழுவதும் சுற்றி வலம் வந்தனர்.

முழு அடைப்பு குறித்து சாமிநாதன் கூறியதாவது:-

இந்த போராட்டம் திட்டமிட்டபடி நாளை நடைபெறும். போராட்டத்திற்காக வணிகர் சங்கங்கள், மார்க்கெட் வியாபாரிகள், பஸ் உரிமையாளர்கள், ஆட்டோ, டெம்போ சங்கத்தினர், மீனவர்கள், தொழிலாளர்கள், தனியார் பள்ளி, கல்லூரி நிர்வாகத்தினர் என அனைத்து தரப்பினரையும் நேரில் சந்தித்தும், கடிதம் மூலமாகவும் ஆதரவு கேட்டுள்ளோம். பெரும்பாலானவர்கள் ஆதரவு தருவதாக உறுதியளித்தனர்.

இதனால் பஸ்கள், டெம்போ, ஆட்டோக்கள் இயங்காது. தனியார் பள்ளி கல்லூரிகள் இயங்காது. இதற்கு முன் புதுவையில் ஆளும் கட்சி தரப்பிலும், பிற கட்சிகள் சார்பிலும் தேவையற்ற வி‌ஷயங்களுக்குக்கூட பந்த் போராட்டம் நடத்தப்பட்டுள்ளது.

இது, பெரும்பான்மை மக்களின் உணர்வை வெளிப்படுத்தும் போராட்டம். இதனால் பந்த் போராட்டம் வெற்றிகரமாக நடைபெறும்.

இவ்வாறு அவர் கூறினார். #SabarimalaIssue #BJP #Bandh

நாகர்கோவில்:

சபரிமலை ஐயப்பன் கோவிலில் அனைத்து வயது பெண்களையும் அனுமதிக்க வேண்டும் என்று சுப்ரீம் கோர்ட்டு உத்தரவிட்டது.

இதற்கு ஐயப்ப பக்தர்கள் எதிர்ப்பு தெரிவித்தனர். சபரிமலைக்கு செல்லும் இளம்பெண்களை தடுத்து நிறுத்தி போராட்டத்திலும் ஈடுபட்டனர்.

பா.ஜனதா, காங்கிரஸ் மற்றும் பல்வேறு இந்து அமைப்புகளும் போராட்டத்தில் பங்கேற்றனர். இதனால் கேரளாவில் பதட்டமான சூழ்நிலை நிலவியது.

பக்தர்களின் போராட்டத்தை கட்டுப்படுத்த போலீசார் சபரிமலையில் 144 தடை உத்தரவு பிறப்பித்தனர். மேலும் சபரிமலை சன்னிதானம் செல்லவும் பல்வேறு கட்டுப்பாடுகள் விதிக்கப்பட்டது.

இந்த பரபரப்பான சூழ்நிலையில் கன்னியாகுமரி தொகுதி பா.ஜனதா கட்சி எம்.பி.யும், மத்திய மந்திரியுமான பொன்.ராதாகிருஷ்ணன் 2 நாட்களுக்கு முன்பு சபரிமலைக்கு இருமுடி கட்டி சென்றார். அவருடன் பா.ஜனதா கட்சி நிர்வாகிகளும் இருந்தனர்.

பொன். ராதாகிருஷ்ணன் சென்ற காரை போலீசார் நிலக்கல் பகுதியில் தடுத்து நிறுத்தினர். தடை உத்தரவு காரணமாக பொன்.ராதாகிருஷ்ணன் காரை தவிர மற்றவர்களின் காரை நிலக்கல்லில் இருந்து பம்பைக்கு அனுமதிக்க முடியாது என்று கூறினர்.

இதனால் போலீசாருக்கும், பொன். ராதாகிருஷ்ணனுக்கும் வாக்குவாதம் ஏற்பட்டது. பின்னர் பொன். ராதாகிருஷ்ணன் காரில் இருந்து இறங்கி ஆதரவாளர்களுடன் பஸ்சில் பம்பை சென்றார். அங்கு தரிசனம் முடிந்து நேற்று அதிகாலையில் அவர், கோவை திரும்பினார்.

அப்போது பம்பை பகுதியில் பொன். ராதாகிருஷ்ணனின் ஆதரவாளர்கள் சென்ற காரை போலீசார் மீண்டும் தடுத்து நிறுத்தி சோதனை செய்தனர். இதற்கும் பொன். ராதாகிருஷ்ணன் கண்டனம் தெரிவித்தார். கேரள அரசும், போலீசாரும் வேண்டுமென்றே ஐயப்ப பக்தர்களை அவமதிப்பதாக குற்றம் சாட்டினார்.

சபரிமலையில் பொன். ராதாகிருஷ்ணன் தடுத்து நிறுத்தப்பட்ட சம்பவத்திற்கு கண்டனம் தெரிவித்தும், கேரள அரசு மற்றும் போலீசாருக்கு கண்டனம் தெரிவித்தும் குமரி மாவட்டத்தில் பா.ஜனதா கட்சியினர் நேற்று போராட்டங்கள் நடத்தினர்.

கேரள முதல்-மந்திரி பினராயி விஜயன் கொடும்பாவி எரிக்கப்பட்டது. இன்று மாவட்டம் தழுவிய முழு அடைப்பு போராட்டம் நடத்தப்படும் என்றும் அறிவித்தது.

போராட்ட அறிவிப்பு வெளியானதும் மாவட்டத்தின் மேற்கு பகுதி கிராமங்களில் பதட்டம் ஏற்பட்டது. நாகர்கோவிலில் இருந்து களியக்காவிளை, கருங்கல், தக்கலை போன்ற நகரங்களுக்கு சென்ற அரசு பஸ்கள் கல்வீசி தாக்கப்பட்டது.

இதில், 8 அரசு பஸ்கள் உடைக்கப்பட்டது. பஸ்கள் மீது கல்வீசப்பட்ட தகவல் அறிந்ததும், போக்குவரத்து அதிகாரிகள் மாவட்டம் முழுவதும் போக்குவரத்தை உடனடியாக நிறுத்தினர்.

இரவு நேர ஸ்டே பஸ்கள் டெப்போக்களுக்கு கொண்டு செல்லப்பட்டது. உட்புற கிராமங்களுக்கு செல்லும் பஸ்கள் நிறுத்தப்பட்டதால் பயணிகள் பெரும் அவதிக்கு ஆளானார்கள்.

இன்று காலையில் மாவட்டத்தின் பெரும்பாலான பகுதிகளில் கடைகள் எதுவும் திறக்கப்படவில்லை. நாகர்கோவில், மணிமேடை, மீனாட்சிபுரம், கோட்டார், செட்டிக்குளம் பகுதிகள் வெறிச்சோடி காணப்பட்டது.

இதுபோல தக்கலை, மார்த்தாண்டம், குழித்துறை, குலசேகரம், கருங்கல் பகுதிகளிலும் கடைகள், வர்த்தக நிறுவனங்கள் மூடிக் கிடந்தன.

குமரி மாவட்டத்தில் வழக்கமாக அதிகாலை 5 மணிக்கு நகர பஸ்கள் ஓடத் தொடங்கும். ஆனால் இன்று டெப்போக்களில் இருந்து எந்த பஸ்களும் பஸ் நிலையங்களுக்கு கொண்டு செல்லப்படவில்லை.

இதனால் வெளியூர்களில் இருந்து நாகர்கோவில் வந்த பயணிகள் மற்றும் ரெயிலில் வந்தவர்கள் சொந்த ஊர்களுக்கு செல்ல முடியாமல் தவித்தனர்.


பஸ்கள் நிறுத்தம், கடைகள் அடைப்பு காரணமாக நாகர்கோவில் வடசேரி, அண்ணா பஸ் நிலையங்களிலும், கோட்டார், பள்ளி விளை ரெயில் நிலையங்களிலும் பயணிகள் போராட்டத்தில் ஈடுபட்டனர். பஸ்களை இயக்க வேண்டும் என்றும் வாக்குவாதத்தில் ஈடுபட்டனர். அவர்களை போலீசார் சமரசம் செய்தனர்.

குமரி மாவட்டத்தில் முழு அடைப்பு போராட்டம் காரணமாக இன்று நடக்க இருந்த மனோன்மணியம் பல்கலைக்கழகத் தேர்வுகள் ரத்து செய்யப்பட்டது. இதனை துணைவேந்தர் பாஸ்கர் அறிவித்தார். அதே நேரம் அரசு பள்ளி, மாணவ-மாணவிகள் பெரும் அவதிக்கு ஆளானார்கள். கிராமப்புறங்களில் இருந்து வரும் மாணவர்கள் பஸ்கள் ஓடாததால் வீடுகளுக்கு திரும்பினர்.

போராட்டம் காரணமாக மார்த்தாண்டம், குழித்துறை, குலசேகரம் மற்றும் நாகர்கோவில் பகுதியில் ஒருசில தனியார் பள்ளிகளுக்கு விடுமுறை அளிக்கப்பட்டது. அரசு மற்றும் அரசு உதவி பெறும் பள்ளிகள் வழக்கம் போல் இயங்கியது. ஆனால குறைவான மாணவர்களே பள்ளிக்கு வந்திருந்தனர்.

முழு அடைப்பு போராட்டம் காரணமாக அலுவலகங்களுக்கு செல்வோர், நோயாளிகள் கடும் அவதிப்பட்டனர்.

திருக்கார்த்திகை தினமான இன்று முழு அடைப்பு நடந்ததால் கார்த்திகை விளக்கு விற்பனையும் கடுமையாக பாதிக்கப்பட்டது. காலையில் சொக்கப்பனை கொளுத்துவது, கோவிலுக்கு செல்வது பாதிக்கப்பட்டதாக பக்தர்கள் குமுறினர்.

இன்று காலையில் தான் வடசேரி, அப்டா மார்க்கெட்டுகளில் கார்த்திகை பொருட்கள் விற்பனை களை கட்டும். பஸ்கள் ஓடாததாலும், கடைகள் மூடப்பட்டதாலும் வியாபாரிகள் பெரும் பாதிப்புக்குள்ளானார்கள்.

முழு அடைப்பு போராட்டத்தையொட்டி மாவட்டம் முழுவதும் பலத்த போலீஸ் பாதுகாப்பு போடப்பட்டிருந்தது. நெல்லை சரக டி.ஐ.ஜி. கபில்குமார் சரத்கார், எஸ்.பி. ஸ்ரீநாத் ஆகியோர் ரோந்து சுற்றி வந்து பாதுகாப்பு பணிகளை பார்வையிட்டனர்.

முக்கிய சந்திப்புகளில் கூடுதல் போலீசார் கண்காணிப்பு பணியில் ஈடுபட்டனர். இதன் காரணமாக காலை 10 மணிக்கு மேல் பஸ்கள் ஓடத் தொடங்கின. அனைத்து டெப்போக்களில் இருந்தும் பஸ்கள் ஒவ்வொன்றாக பஸ் நிலையம் வந்தது. அவை போலீஸ் பாதுகாப்புடன் முக்கிய நகரங்களுக்கு இயக்கப்பட்டது. #BJPBandh #KanyakumariBandh #PonRadhakrishnan

புதுடெல்லி:

எஸ்.சி-எஸ்.டி சட்டத்தின் கீழ் அப்பாவிகள் தண்டிக்கப்படுவதை தடுப்பதற்காக இச்சட்டத்தின் கீழ் குற்றம் சாட்டப்படுகிறவர்களுக்கு ஜாமின் வழங்க வேண்டும். அரசு அதிகாரிகள் மீது குற்றம் சாட்டப்பட்டால் விசாரணை நடத்தி போதிய ஆதாரம் இருப்பதாக கருதினால் மட்டுமே வழக்கு தொடர வேண்டும் என்று கடந்த மார்ச் மாதம் 20-ந்தேதி சுப்ரீம் கோர்ட்டு தீர்ப்பளித்தது.

இந்த தீர்ப்பை எதிர்த்து மத்திய அரசு சுப்ரீம் கோர்ட்டில் சீராய்வு மனு தாக்கல் செய்தது. அதை சுப்ரீம் கோர்ட்டு தள்ளுபடி செய்தது. இதனால் எஸ்.சி., எஸ்.டி., வன்கொடுமை சட்டத்தின் பிரிவுகளை நீடிக்கச்செய்யும் வகையில் அதில் சட்ட திருத்தத்தை மத்திய அரசு கடந்த ஆகஸ்ட் மாதம் 9-ந்தேதி பாராளுமன்றத்தில் கொண்டு வந்தது.

இதை எதிர்த்து வட மாநிலங்களில் ஓ.பி.சி. வகுப்பினரும், பொது பட்டியல் வகுப்பினரும் உத்தரபிரதேசம், ராஜஸ்தான், பீகார், மத்திய பிரதேசம் உள்ளிட்ட வட மாநிலங்களில் போராட்டம் நடத்தி வருகிறார்கள்.

நேற்று வட மாநிலங்களில் நாடு தழுவிய ‘பாரத் பந்த்’ போராட்டத்துக்கு அழைப்பு விடுக்கப்பட்டது. இதில் பல இடங்களில் தீவைப்பு வன்முறை நடந்தது. போலீசார் துப்பாக்கி சூடு நடத்தி வன்முறையை கட்டுப்படுத்தினார்கள்.

உத்தரபிரதேசத்தில் பிரதமர் மோடியின் சொந்த தொகுதியான வாரணாசியில் உருவ பொம்மை எரிக்கப்பட்டது. மத்திய பிரதேசம், ராஜஸ்தான் மாநிலங்களில் 144 தடை உத்தரவு பிறப்பிக்கப்பட்டு பள்ளி-கல்லூரிகள் மூடப்பட்டு இருந்தது. சாலைகளில் தடை ஏற்படுத்தப்பட்டதால் போக்குவரத்து பாதிக்கப்பட்டது.

பாட்னாவில் போராட்டக்காரர்கள் பல இடங்களில் கண்டன பேரணி நடத்தினார்கள். ரெயில் மறியலில் ஈடுபட்டு ரெயில் தண்டவாளத்துக்கு தீ வைத்தனர். இதனால் பீகாரில் ரெயில் போக்குவரத்து பாதுக்கப்பட்டது.

மத்திய பிரதேசத்தில் ஓ.பி.சி. மற்றும் உயர் சாதி வகுப்பைச் சேர்ந்த 150 அமைப்புகள் ஒன்று சேர்ந்து போராட்டம் நடத்தினார்கள்.

உத்தரப் பிரதேசத்தில் லக்னோ, ஆக்ரா மற்றும் அதனைச் சுற்றியுள்ள மாவட்டங்களில் போக்குவரத்து பாதிக்கப்பட்டதால் மக்களின் இயல்பு வாழ்க்கை பாதிக்கப்பட்டது. கடைகள், வர்த்தக நிறுவனங்கள், பள்ளிகள், கல்லூரிகள் மூடப்பட்டு இருந்தன.

ராஜஸ்தானில் ஜெய்ப்பூர், ஜோத்பூர் உள்பட பல நகரங்களில் முழு அடைப்பு போராட்டம் நடந்தது. ஆங்காங்கே பல்வேறு அமைப்புகள் சார்பில் ஆர்ப்பாட்டம், உருவபொம்மை எரிப்பு போராட்டங்கள் நடந்தன.

போராட்டத்தையொட்டி வட மாநிலங்களில் பலத்த பாதுகாப்பு போடப்படு இருந்தது. #SCST

சென்னை:

பெட்ரோல் - டீசல் விலையை தினசரி நிர்ணயித்துக் கொள்ளும் அதிகாரம் எண்ணை நிறுவனங்களுக்கு கடந்த ஆண்டு ஜூன் மாதம் வழங்கப்பட்டது.

அன்று முதல் பெட்ரோல் - டீசல் விலை தினசரி நிர்ணயிக்கப்பட்டு வருகிறது. தொடர்ந்து விலை உயர்த்தப்பட்டு தற்போது ஒரு லிட்டர் பெட்ரோல் ரூ.82.62 ஆகவும், டீசல் ரூ.75.61 ஆகவும் விற்கிறது.

இதே நிலை நீடித்தால் விரைவில் லிட்டர் ரூ.100-ஐ எட்டிவிடும் என்று எதிர் பார்க்கப்படுகிறது. இந்த விலை உயர்வு காரணமாக விலைவாசி உயர்வும் ஏற்பட்டு வருகிறது.

எனவே பெட்ரோல்-டீசல் விலையை கட்டுப்படுத்த வேண்டும். பெட்ரோலிய பொருட்களை ஜி.எஸ்.டி. வரம்புக்குள் கொண்டு வர வேண்டும். மத்திய உற்பத்தி வரியையும், மாநில வாட் வரியையும் குறைக்கவும் வலியுறுத்தி வருகிற 10-ந்தேதி (திங்கட்கிழமை) நாடு தழுவிய ‘பாரத் பந்த்’ நடத்த காங்கிரஸ் கட்சி முடிவு செய்துள்ளது.

பா.ஜனதாவுக்கு எதிரான அனைத்து எதிர்க்கட்சிகளையும் திரட்டி ‘பந்தை’ வெற்றிகரமாக நடத்த காங்கிரஸ் முடிவு செய்துள்ளது. இது தொடர்பாக அனைத்து மாநில காங்கிரஸ் தலைவர்களுக்கும் சுற்றறிக்கை அனுப்பி இருக்கிறார்கள்.

பந்தை வெற்றிகரமாக நடத்த காங்கிரசும் அதன் கூட்டணி கட்சிகளும் தீவிர முயற்சி எடுத்து வருகின்றன.

தி.மு.க. தலைவர் மு.க. ஸ்டாலின் வெளியிட்டுள்ள அறிக்கையில் கூறி இருப்பதாவது:-

மத்திய பா.ஜ.க. ஆட்சி யில், மக்களின் நலனைப் பின்னுக்குத் தள்ளி எண்ணெய் நிறுவனங்களின் அபரிமிதமான லாப நோக்கத்தை நிறைவேற்றிக் கொள்ளும் பொருட்டு, பெட்ரோல்-டீசல் விலை கிடுகிடுவென உயர்த்தப்பட்டு, லிட்டர் ஒன்றுக்கு 100 ரூபாயை வேகமாக நெருங்கி வருவது, மிகுந்த கவலையளிப்பதாகவும், வேதனையளிப்பதாகவும் இருக்கிறது.

கச்சா எண்ணை விலை சர்வதேச சந்தையில் குறைந்த போதெல்லாம் அடுத்தடுத்து “கலால் வரி” விதித்து வாக்களித்த மக்களை வஞ்சிப்பதில், பிரதமர் நரேந்திரமோடி தலைமையிலான பா.ஜ.க. அரசு தீவிரமாக கவனம் செலுத்தியதே தவிர, மக்களின் வருவாய், வாங்கும் சக்தி ஆகியவற்றைப் பற்றி, எவ்வித அக்கறையும் எடுத்துக் கொள்ளவில்லை.

பா.ஜ.க.விற்குச் சாதக மான மாநிலங்களில் தேர்தல் வந்தால், பெட்ரோல், டீசல் விலை உயர்வைத் தற்காலிகமாக நிறுத்தி வைக்கும் எண்ணெய் நிறுவனங்கள், தேர்தல் முடிந்ததும் மீண்டும் எவ்விதத் தடையுமின்றி தாராளமாக வி‌ஷம் போல் பெட்ரோல் டீசல் விலையை உயர்த்தி வருகின்றன.

வரலாறு காணாத பெட்ரோல்-டீசல் விலை ஏற்றத்தைக் கட்டுப்படுத்தவோ குறைக்கவோ, டாலருக்கு நிகரான ரூபாயின் மதிப்பு சரிந்து கொண்டிருப்பதைத் தடுத்து நிறுத்தவோ, மத்தியில் உள்ள பா.ஜ.க. அரசு எந்த நடவடிக்கையும் எடுக்காமல், வேதனைத் தீயில் வெந்து கருகிக் கொண்டிருக்கும் இந்திய மக்களை வீதியில் நின்று போராடும் நிலைக்கு இறக்கியிருப்பது, மக்களால் தேர்ந்தெடுக்கப்பட்ட அரசுக்குரிய அடிப்படை இலக்கணமாக அறவே இல்லை.

ஆகவே பெட்ரோல்-டீசல் விலை உயர்வைக் கண்டித்து, அகில இந்தியக் காங்கிரஸ் கட்சியின் சார்பில், செப்டம்பர் 10-ந்தேதி அறிவிக்கப்பட்டுள்ள நாடு தழுவிய “பாரத் பந்திற்கு”, தி.மு.க. மனப்பூர்வமான ஆதரவினை நல்கி, அந்த பந்த் முழு அளவில் வெற்றி பெற ஆர்வத்துடன் பங்கேற்று, அனைத்து வழிகளிலும் ஒத்துழைக்கும் என்று தெரிவித்துக் கொள்கிறேன். பந்த் நடைபெறும் தேதியில் அரசு ஊழியர்கள், ஆசிரியர்கள், சிறு குறு வணிகர்கள், பொது போக்குவரத்துத் தொழிலாளர்கள் உள்ளிட்ட அனைத்துத் தரப்பு மக்களும் தன்னார்வத்துடன் கலந்து கொண்டு, மத்தியில் உள்ள பா.ஜ.க. அரசுக்குத் தக்க பாடம் புகட்டிட முன்வர வேண்டும்.

இவ்வாறு அதில் கூறியுள்ளார்.

தமிழக காங்கிரஸ் தலைவர் திருநாவுக்கரசர்:-

வரலாறு காணாத அளவு பெட்ரோல்-டீசல் விலையை மத்திய அரசு உயர்த்தி உள்ளது. உலகின் எந்த நாட்டிலும் இந்த அளவுக்கு விலை உயர்வு இல்லை. கச்சா எண்ணை விலை குறைந்து உள்ள நிலையில் லிட்டர் ரூ.35 முதல் ரூ.40-க்கு விற்க முடியும். ஆனால் மத்திய அரசு 2 மடங்கு விலையை உயர்த்தி மக்களின் பணத்தை பறிக்கிறது.

இதை கண்டித்து அகில இந்திய அளவில் பாரத் பந்த் வருகிற 10-ந்தேதி நடத்த முடிவு செய்யப்பட்டுள்ளது. அனைத்து கட்சிகளும், வணிக அமைப்புகளும், பொதுமக்களும் முழு ஆதரவு தருமாறு வேண்டுகிறேன். ஏற்கனவே ஆதரவு தெரிவித்துள்ள தி.மு.க. உள்ளிட்ட அனைத்து கட்சிகளுக்கும் நன்றி தெரிவித்துக் கொள்கிறேன்.

பெட்ரோல், டீசல் விலை உயர்வு நாடு முழுவதும் அனைத்து தரப்பு மக்களையும் பாதிக்கிறது. மறைமுகமாக விலை உயர்வுக்கு வழி வகுக்கிறது. அகில இந்திய அளவில் மக்கள் பாதிக்கும் போது அகில இந்திய அளவிலான எதிர்க்கட்சி என்ற நிலையில் நாடு தழுவிய முழு வேலை நிறுத்தத்துக்கு காங்கிரஸ் கட்சி அழைப்பு விடுத்துள்ளது.

த.மா.கா.வை பொறுத்த வரை மக்களின் எண்ணங்களை என்றும் பிரதிபலிக்கும். அதன் அடிப்படையில் இந்த முழு அடைப்புக்கு முழு ஆதரவு அளிக்கிறோம்.

இந்திய கம்யூனிஸ்டு கட்சியின் மாநில செயலாளர் முத்தரசன்:-

பெட்ரோல், டீசல் விலை கடுமையாக உயர்ந்து வருகிறது. மத்திய - மாநில அரசுகள் தங்கள் வரியை குறைத்தால் பெட்ரோல், டீசல் விலை குறைய வாய்ப்பு உண்டு. ஆனால் மத்திய - மாநில அரசுகள் மறுத்து வருகின்றன.

இதை கண்டித்து 10-ந் தேதி நடைபெற உள்ள பாரத் பந்த்துக்கு எங்கள் முழு ஆதரவு உண்டு. வணிக பெருமக்கள், பொதுமக்கள் அனைவவரும் முழு ஆதரவு அளித்து முழு அடைப்பை வெற்றிகரமாக நடத்த ஒத்துழைக்க வேண்டும்.

மார்க்சிஸ்டு கம்யூனிஸ்டு செயலாளர் கே.பாலகிருஷ்ணன்:-

முழு அடைப்பு போராட்டம் பற்றி ஆலோசிப்பதற்காக இடது சாரி கட்சிகளின் ஆலோசனை கூட்டம் இன்று நடந்தது. இந்த கூட்டத்தில் நான், ஜி.ராமகிருஷ்ணன், டி.கே.ரங்கராஜன், இந்திய கம்யூனிஸ்டு சார்பில் மு. வீரபாண்டியன், சி.பி.ஐ.எம்.எல். சார்பில் குமார், குமரேஷ், எஸ்.யூ.சி.ஐ. (கம்யூனிஸ்டு) சார்பில் சிவகுமார், சுருளி ஆண்டவன் ஆகியோர் கலந்து கொண்டனர்.

மோடி அரசின் மோசமான பொருளாதார கொள்கை, பெட்ரோல்-டீசல் விலை உயர்வு ஆகியவற்றை கண்டித்து 10-ந்தேதி நாடு தழுவிய முழு அடைப்புக்கு இடது சாரி கட்சிகள் அறைகூவல் விடுத்துள்ளன. இந்த பந்தை வெற்றிகரமாக நடத்த அனைத்து அரசியல் கட்சிகள், அரசு ஊழியர்கள், வர்த்தகர்கள், வாகன ஓட்டுனர்கள் உள்பட அனைத்து தரப்பினரும் முழு ஆதரவு அளிக்க வேண்டும்.

விடுதலை சிறுத்தைகள் கட்சியும் இந்த முழு அடைப்பு போராட்டத்துக்கு முழு ஆதரவு அளிக்கும் என்று திருமாவளவன் கூறினார்.

மனிதநேய மக்கள் கட்சி தலைவர் ஜவாஹிருல்லா கூறியதாவது:-

தொடர்ந்து நாள் தோறும் பெட்ரோ-டீசல் விலை உயர்வால் சாமானியர்கள், ஊழைக்கும் மக்கள் என அனைத்து தரப்பினரும் பாதிக்கப்பட்டுள்ளனர். மோடி அரசின் தவறான பொருளாதார அணுகு முறையே இதற்கு காரணம். இதற்கு எதிர்ப்பு தெரிவித்து காங்கிரஸ் நல்ல முடிவை எடுத்துள்ளது. காங்கிரஸ் கட்சி நடத்தும் முழு அடைப்புக்கு முழு ஆதரவு அளிக்கிறது.

இந்திய யூனியன் முஸ்லிம் லீக் தலைவர் காதர்மொகிதீன்:-

10-ந்தேதி நடைபெறும் பந்துக்கு முழு ஆதரவு. அனைத்து மக்களும் தங்கள் எதிர்ப்பை ஒட்டு மொத்தமாக தெரிவிக்கும் வகையில் முழு ஆதரவையும் ஒத்துழைப்பையும் வழங்க வேண்டும்.

இவ்வாறு அவர்கள் கூறியுள்ளனர். #PetrolDieselPrice #FuelPrice #BharatBandh #DMK

திருப்பூர்:

தூத்துக்குடி துப்பாக்கி சூடு சம்பவத்தை கண்டித்து தமிழகம் முழுவதும் இன்று கடையடைப்பு போராட்டத்திற்கு தி.மு.க. உள்ளிட்ட அனைத்து கட்சிகள் அறிவித்து இருந்தது.

இதனை தொடர்ந்து தமிழகம் முழுவதும் இன்று கடையடைப்பு போராட்டம் நடைபெற்றது. பனியன் நகரமான திருப்பூரில் பனியன் மற்றும் அதனை சார்ந்த 2 ஆயிரத்திற்கும் மேற்பட்ட நிறுவனங்கள் உள்ளது. அவைகள் அனைத்தும் இன்று அடைக்கப்பட்டு இருந்தது.

திருப்பூர் மற்றும் அதனை சுற்றி உள்ள அனுப்பர் பாளையம் பகுதியில் பாத்திர உற்பத்தி நடைபெற்று வருகிறது. இந்த நிறுவனங்களும் அடைக்கப்பட்டு இருந்தது.

முழு அடைப்பு காரணமாக திருப்பூரில் ரூ. 200 கோடி பனியன் வர்த்தகம் பாதிக்கப்பட்டுள்ளது. பனியன் நிறுவனம் அடைக்கப்பட்டதால் 5 லட்சத்திற்கும் மேற்பட்ட தொழிலாளர்கள் பாதிப்புக்கு உள்ளானார்கள்.

திருப்பூரில் பனியன் நிறுவனம் மட்டுமின்றி ஓட்டல்கள், கடைகள், காய்கறி மார்க்கெட் உள்ளிட்டவைகளும் அடைக்கப்பட்டு இருந்தது. ஒரு சில ஆட்டோக்கள் ஓடவில்லை. இதனால் எப்போதும் பரபரப்பாக காட்சியளிக்கும் புதுமார்க்கெட், அவினாசி ரோடு, கடை வீதிகள் வெறிச்சோடி காணப்பட்டது.

திருப்பூர் மாநகர போலீஸ் கமி‌ஷனர் நாகராஜன் உத்தரவின் பேரில் ரெயில் நிலையம், பஸ் நிலையம், ரெயில் நிலையம், மாநகராட்சி அலுவலகம் உள்ளிட்ட பகுதிகளில் போலீஸ் பாதுகாப்பு போடப்பட்டு இருந்தது.

அசம்பாவிதங்களை தடுக்க போலீசார் ரோந்து பணியிலும் தீவிரமாக ஈடுபட்டு வருகிறார்கள்.

அவினாசி, ஆட்டையாம் பாளையம், கைகாட்டி புதூர், சேவூர் ரோடு உள்ளிட்ட பகுதிகளில் கடைகள் அடைக்கப்பட்டு இருந்தது. அவினாசி தினசரி மார்க்கெட் மூடப்பட்டிருந்தது. ஆனால் பஸ்கள் வழக்கம் போல் ஓடியது.

நீலகிரி மாவட்டம் ஊட்டி, குன்னூர், கோத்தகிரி ஆகிய இடங்களில் இன்று கடைகள் அடைக்கப்பட்டு இருந்தது. ஆட்டோக்கள் வழக்கம் போல் ஓடியது. கடைகள் அடைக்கப்பட்டு இருந்ததால் ஊட்டிக்கு சுற்றுலா வந்த பயணிகள் அவதியடைந்தனர்.

புதுச்சேரி:

தூத்துக்குடி துப்பாக்கி சூடு சம்பவத்தை கண்டித்தும், இதற்கு பொறுப்பேற்று முதல்-அமைச்சர் எடப்பாடி பழனிச்சாமி ராஜினாமா செய்ய வேண்டும் என வலியுறுத்தியும் தி.மு.க. சார்பில் தமிழ்நாட்டில் இன்று முழு அடைப்பு நடத்தப்பட்டது.

அதே போல் புதுவையிலும் முழு அடைப்பு நடத்தப்படும் என்று தி.மு.க.வினர் அறிவித்து இருந்தனர். இதற்கு காங்கிரஸ் உள்ளிட்ட தோழமை கட்சியினர் ஆதரவு தெரிவித்தனர். இன்று காலை 6 மணிக்கு முழு அடைப்பு போராட்டம் தொடங்கியது.

அனைத்து பகுதிகளிலும் கடைகள் அடைக்கப்பட்டு இருந்தன. புதுவையில் கடைகள் நிறைந்து காணப்படும் நேரு வீதி, காந்தி வீதி, அண்ணா சாலை, மி‌ஷன் வீதி, சின்ன சுப்புராயப் பிள்ளை வீதி, பாரதி வீதி, காமராஜர் சாலை, மறைமலை அடிகள் சாலை, எஸ்.பி. பட்டேல் சாலை, புஸ்சி வீதி, கடலூர் சாலை, விழுப்புரம் சாலை, வழுதாவூர் சாலை என அனைத்து பகுதிகளிலும் கடைகள் அடைக்கப்பட்டு இருந்தன.

அதேபோல் பெரிய மார்க்கெட், முத்தியால் பேட்டை மார்க்கெட், சின்னக்கடை மார்க்கெட், முதலியார் பேட்டை மார்க்கெட் ஆகியவையும் மூடப்பட்டு இருந்தன.

ஒரு சில இடங்களில் மட்டும் பெட்டிக்கடைகள் திறந்து இருந்தன. அனைத்து கடைகளையும் மூடும்படி வற்புறுத்தி தி.மு.க.வினர் மோட்டார் சைக்கிளில் வீதி, வீதியாக சென்றனர். இதனால் திறந்து இருந்த ஒன்றிரண்டு சிறு, சிறு கடைகளும் மூடப்பட்டன.

காமராஜர் சாலையில் ஒரு பெட்ரோல் பங்க் செயல்பட்டு வந்தது. இதை பார்த்த தி.மு.க.வினர் பெட்ரோல் பங்க் அலுவலக கண்ணாடி மீது கல்வீசி தாக்குதல் நடத்தினார்கள். இதில் கண்ணாடிகள் நொறுங்கி விழுந்தன. இதன் பிறகு அந்த பெட்ரோல் பங்க் மூடப்பட்டது.

இதே போல் அனைத்து பகுதிகளிலும் பெட்ரோல் பங்க்குகளும் மூடப்பட்டன.

புதுவையில் இன்று முற்றிலும் பஸ்கள் ஓடவில்லை. வெளியூர்களில் இருந்து வரும் தமிழக அரசு பஸ்கள் நேற்று இரவே நிறுத்தப்பட்டன.

சென்னையில் இருந்து புதுவை வழியாக கடலூர், சிதம்பரம், சீர்காழி, மயிலாடுதுறை, நாகப்பட்டினம் போன்ற ஊர்களுக்கு தமிழக அரசு பஸ்கள் இயக்கப்படும். இன்று அவையும் நிறுத்தப்பட்டன. தமிழக அரசு பஸ்கள் எதுவுமே புதுவைக்கு வரவில்லை.

அதே போல் புதுவையில் அரசு பஸ்களும் இயக்கப்படவில்லை. தனியார் பஸ்களும் முற்றிலும் நிறுத்தப்பட்டன.

பஸ்கள் முற்றிலும் ஓடாததால் வெளியூர்களில் இருந்து வந்த பயணிகள் பஸ் நிலையத்திலேயே முடங்கி இருக்கிறார்கள்.

ஆட்டோ, டெம்போ உள்ளிட்ட வாகனங்களும் இயக்கப்படவில்லை. இதனால் பொதுமக்கள் ஒரு இடத்தில் இருந்து இன்னொரு இடத்துக்கு செல்ல முடியாம் மிகவும் சிரமப்பட்டனர். முழு அடைப்பையொட்டி அனைத்து பகுதிகளிலும் போலீஸ் பாதுகாப்பு போடப்பட்டு இருந்தது.

முழு அடைப்பினால் புதுவையில் மக்களின் இயல்பு வாழ்க்கை முற்றிலும் பாதிக்கப்பட்டு இருந்தது.

புதுச்சேரி:

தூத்துக்குடியில் ஸ்டெர்லைட் ஆலைக்கு எதிராக நடந்த போராட்டத்தின் போது போலீசார் துப்பாக்கிச் சூடு நடத்தியதில் 13 பலர் கொல்லப்பட்டனர். பலர் காயமடைந்து மருத்துவமனையில் சிகிச்சை பெற்று வருகின்றனர். போராட்டக்காரர்கள் மீது துப்பாக்கிச்சூடு நடத்தியதற்கு அரசியல் தலைவர்கள் மற்றும் பல்வேறு அமைப்பை சேர்ந்தவர்கள் கண்டனம் தெரிவித்தனர். மாநிலம் முழுவதும் போராட்டங்களும் நடைபெற்று வருகின்றன.


முழு அடைப்பு போராட்டத்தில் ஆளுங்கட்சியான காங்கிரஸ் மற்றும் தி.மு.க. உள்ளிட்ட கட்சிகள் பங்கேற்றுள்ளதால், பெரும்பாலான இடங்களில் கடைகள் அடைக்கப்பட்டு, சாலைகள் வெறிச்சோடி காணப்படுகின்றன. முழு அடைப்பு காரணமாக அரசு பேருந்துகள், தனியார் பேருந்துகள் மற்றும் ஆட்டோக்கள் இயங்கவில்லை. தியேட்டர்களும் மூடப்பட்டுள்ளன.  #ThoothukudiFiring #SterliteProtest #DMKBandh